«Trieste, ala fin te son sempre quela»: la poesia che celebra la vita ed i ricordi triestini
Riportiamo la bellissima poesia di Maurizio Dossi pubblicata sul gruppo Te son de Trieste se... La poesia celebra Trieste, la vita, i ricordi e le piccole cose che ogni giorno ci accompagnano nel nostro percorso.
A Trieste.
Son nato qua, in Primavera.
Sessanta primavere
le xe passade e ti, Trieste,
ala fin te son sempre quela.
Co zogavo a scinche con i amici sul marciapie
risciando anche de perder la più granda,
la più bela. O con le figurine a scola,
quando el scudeto del Reàl Madrid valeva oro...
La mia prima bicicleta, e via a corer un drio de l'altro
a Sant'Andrea, col gelato ala fin che mama ne comprava.
Nonna me ricordo, che la abitava in Greta
nele case popolari.
Povera, el gato che la tigniva
gaveva dado via de mato
e la gaveva le gambe straziade
de sta bestia povera anca ela...
Co i xe vignudi col saco a ciaparlo
e de lui più gnente no savevimo.
La radiolina che la ne contava le partide,
con Papà che zogava sempre do colone,
una fissa, sempre quela, e una a puf,
ala come capita.
Dio come me ricordo el treno dele Rive e noi
che magnavimo sardoni vardandolo passar.
Che spetacolo per mi, che me imaginavo sto treno
grando, che el se fermava quando un auto i lo
meteva storto.
E mio Papà, che ingegner naval el iera,
che me tigniva in brazzo , alto
quando la Raffaello la ghe se scesa in mar
solevando una onda che fin a Muja
la ghe xe rivada.
De trovar posto per l'auto problemi no iera
e con la prima auto che mio Pare el me comprava
per portarlo a lui e Mama in giro.
Meno mal che i ga salvado el Tram de Opcina, che ghe
stavo indosso al tramvier per veder tuto...
e cossa gaveria dado per manovrar
quela levetta che la fazeva passar l'aria
e che ei tram la ralentava.
Bon semo nel 2017... roba che mai pensavo de rivar
e dir che no son vecio, ma soto GMA ancora che
son nato. E mia Mama, ancora fedele
alla abitudine paterna de pregar per
el nostro Imperator, che del 906 la iera nata
e tuto la se ricordava...
Bon, andemo avanti e anca se barche
San Marco no fa più, pazienza... Alberghi e Casino'
galleggianti ancora i fa qua a Monfalcon.
Ala insegna ancora e sempre, de
Viva l' A. e po bon.
Autore: Maurizio Dossi, medico triestino.